Baku şäherinde “Azerbaýjan Respublikasynyň we Türkmenistanyň köpugurly hyzmatdaşlygy: gazanylan üstünlikler we geljekki mümkinçilikler” atly halkara ylmy-amaly simpozium geçirildi

2025-nji ýylyň 18-nji iýunynda Türkmenistanyň Azerbaýjan Respublikasyndaky Ilçihanasynyň we Azerbaýjanyň Halkara gatnaşyklary boýunça seljeriş merkeziniň bilelikde guramagynda 2025-nji ýylyň Halkara parahatçylyk we ynanyşmak ýyly diýlip yglan edilmegi we Türkmenistanyň hemişelik Bitaraplygynyň 30 ýyllygy mynasybetli “Türkmenistanyň we Azerbaýjanyň köpugurly hyzmatdaşlygy: gazanylan üstünlikler we geljekki mümkinçilikler” atly halkara ylmy-amaly simpozium geçirildi.

Simpoziuma Azerbaýjan Respublikasynyň Daşary işler ministriniň orunbasary S.Şarifow, Halkara gatnaşyklary boýunça seljeriş merkeziniň başlygy F.Şafiýew, Türkmenistanyň DIM-niň Halkara gatnaşyklary institutynyň Strategik barlaglar boýunça ylmy merkeziniň başlygy Ş.Şiriýew, Türkmenistanyň Azerbaýjandaky Ilçisi G.Elýasow, Azerbaýjanyň Milli Mejlisiniň deputaty we Türkmen-Azerbaýjan Parlamentara dostluk toparynyň azerbaýjan böleginiň ýolbaşçysy T.Rustamhanly, şeýle hem ýerli deputatlar, bilermenler we habarçylar gatnaşdylar.

Çykyş edenler dünýädäki häzirki geosyýasy çylşyrymly ýagdaýda, Türkmenistanyň hemişelik Bitaraplygynyň halkara gatnaşyklarynda parahatçylygy, sebitleýin we ählumumy howpsuzlygy, şeýle hem durnuklylygy berkitmekdäki ornuny we Türkmenistanyň hemişelik Bitaraplygynyň halkara diplomatiýasyny alyp barmak üçin netijeli gural bolup hyzmat edýändigini bellediler.